chaut pas tant, quel soit nostre estre, en nous, et en effect, comme quel il soit, en la cognoissance publique. Les biens mesmes de l’esprit, et la sagesse, nous semblent sans fruict, si elle n’est iouye que de nous : si elle ne se produict à la veuë et approbation estrangere. Il y en a, de qui l’or coulle à gros bouillons, par des lieux sousterreins, imperceptiblement : d’autres l’estendent tout en lames et en feuilles. Si qu’aux vns les liars valent escuz, aux autres le contraire : le monde estimant l’emploite et la valeur, selon la montre. Tout soing curieux autour des richesses sent à l’auarice. Leur dispensation mesme, et la liberalité trop ordonnee et artificielle elles ne valent pas vne aduertance et sollicitude penible. Qui veut faire sa despense iuste, la fait estroitte et contrainte. La garde, ou l’emploitte, sont de soy choses indifferentes, et ne prennent couleur de bien ou de mal, que selon l’application de nostre volonté.L’autre cause qui me conuie à ces promenades, c’est la disconuenance aux mœurs presentes de nostre estat : ie me consolerois aysement de cette corruption, pour le regard de l’interest public :
Peioraque sæcula ferri
Temporibus, quorum sceleri non inuenit ipsa
Nomen, et à nullo posuit natura metallo :
mais pour le mien, non. I’en suis en particulier trop pressé. Car en mon voisinage, nous somines tantost par la longue licence de ces guerres ciuiles, enuicillis en vne forme d’estat si desbordee,
qu’à la verité, c’est merueille qu’elle se puisse maintenir.
Armati terram exercent, sempérque recentes
Conuectare iuuat prædas, et viuere raplo.
En fin ie vois par nostre exemple, que la societé des hommes se tient et se coust, à quelque prix que ce soit. En quelque assiette qu’on les couche, ils s’appilent, et se rengent, en se remuant et s’entassant : comme des corps mal vnis qu’on empoche sans ordre, trouuent d’eux mesmes la façon de se ioindre, et s’emplacer, les vns parmy les autres : souuent mieux, que l’art ne les cust sceu disposer. Le Roy Philippus fit vn amas, des plus meschans hommes et incorrigibles qu’il peut trouuer, et les logea tous en vne ville, qu’il leur fit bastir, qui en portoit le nom. I’estime qu’ils dresserent des vices mesme, vne contexture politique entre eux, et vne commode et iuste societé. Ie vois, non vne action, ou trois, ou cent, mais des mururs, en vsage commun et reçeu, si farouches, en inhumanité sur tout et desloyauté, qui est pour moy la pire espece des
