pérance d’eschauffer leur volonté. Mais d’vne souche, il n’y a ny qu’esperer, ny que iouyr qui vaille.Or quoy, si ie prends les choses autrement qu’elles ne sont ? Il peut estre. Et pourtant i’accuse mon impatience. Et tiens, premierement, qu’elle est esgallement vitieuse en celuy qui a droit, comme en celuy qui a tort. Car c’est tousiours vn’aigreur tyrannique, de ne pouuoir souffrir vne forme diuerse à la sienne. Et puis, qu’il n’est à la verité point de plus grande fadesc, et plus constante, que de s’esmouuoir et piquer des fadeses du monde, ny plus heteroclite. Car elle nous formalise principallement contre nous et ce philosophe du temps passé n’eust iamais eu faute d’occasion à ses pleurs, tant qu’il se fust considere. Mison I’vn des sept sages, d’vne humeur Timoniene et Democritiene interrogé, dequoy il rioit seul De ce que ie ris seul : respondit-il. Combien de sottises dis-ie, et respons-ie tous les iours, selon moy : et volontiers donq combien plus frequentes, selon autruy ? Si ie m’en mors les leures, qu’en doiuent faire les autres ? Somme, il faut viure entre les viuants, et laisser la riuiere courre sous le pont, sans nostre soing ou à tout le moins, sans nostre alteration. De vray, pourquoy sans nous esmouuoir, rencontrons nous quelqu’vn qui ayt le corps tortu et mal basty, et ne pouuons souffrir le rencontre d’vn esprit mal rengé, sans nous mettre en cholere ? Cette vitieuse aspreté tient plus au iuge, qu’à la faute. Ayons tousiours en la bouche ce mot de Platon : Ce que ie treuue mal sain, n’est-ce pas pour estre moy-mesmes mal sain ? Ne suis-ie pas moy-mesmes en coulpe ? mon aduertissement se peut-il pas renuerser contre moy ? Sage et diuin refrein, qui fouete la plus vnimerselle, et commune erreur des hommes. Non seulement les reproches, que nous faisons les vns aux autres, mais noz raisons aussi, et noz arguments et matieres controuerses, sont ordinairement retorquables à nous et nous enferrons de noz armes. Dequoy l’ancien— neté m’a laissé assez de graues exemples. Ce fut ingenieusement dit et bien à propos, par celuy qui l’inuenta :
Noz yeux ne voyent rien en derriere. Cent fois le iour, nous nous moquons de nous sur le subiect de nostre voysin, et detestons en d’autres, les defauts qui sont en nous plus clairement : et les admirons d’vne merueilleuse impudence et inaduertence. Encores hier ie fus à mesmes, de veoir vn homme d’entendement se moquant autant plaisamment que iustement, de l’inepte façon d’vn autre, qui
