Page:Montaigne - Essais, Didot, 1907, tome 3.djvu/318

obstination de souffrir toutes extremitez et difficultez, et la mort, plus volontiers, que de se soubsmettre à la domination de ceux, de qui ils ont esté si honteusement abusez : et aucuns, choisissans plutost de se laisser defaillir par faim et par iecusne, estans pris, que d’accepter le viure des mains de leurs ennemis, si vilement victorieuses ie preuois que à qui les eust attaquez pair à pair, et d’armes, et d’experience, et de nombre, il y eust faict aussi dangereux, et plus, qu’en autre guerre que nous voyons.Que n’est tombee soubs Alexandre, ou soubs ces anciens Grecs et Romains, vne si noble conqueste : et vne si grande mutation et alteration de tant d’empires et de peuples, soubs des mains, qui eussent doucement poly et defriché ce qu’il y auoit de sauuage : et eussent conforté et promeu les bonnes semences, que Nature y auoit produit : meslant non seulement à la culture des terres, et ornement des villes, les arts de deça, en tant qu’elles y eussent esté necessaires, mais aussi, meslant les vertus Grecques et Romaines, aux origineles du pays ? Quelle reparation eust-ce esté, et quel amendement à toute cette machine, que les premiers exemples et deportemens nostres, qui se sont presentez par delà, eussent appellé ces peuples, à l’admiration, et imitation de la vertu, et eussent dressé entre-cux et nous, vne fraternelle societé et intelligence ? Combien il eust esté aisé, de faire son profit, d’ames si neuues, si affamees d’apprentissage, ayants pour la plus part, de si beaux commencemens naturels ? Au rebours, nous nous sommes seruis de leur ignorance, et inexperience, à les plier plus facilement vers la trahison, luxure, auarice, et vers toute sorte d’inhumanité et de cruauté, à l’exemple et patron de nos meurs. Qui mit iamais à tel prix, le seruice de la mercadence et de la trafique ? Tant de villes rasees, tant de nations exterminees, tant de millions de peuples, passez au fil de l’espce, et la plus riche et belle partie du monde bouleuersee, pour la negotiation des perles et du poiure. Mechaniques victoires. lamais l’ambition, iamais les inimitiez publiques, ne pousserent les hommes, les vns contre les autres, à si horribles hostilitez, et calamitez si miserables.En costoyant la mer à la queste de leurs mines, aucuns Espagnols prindrent terre en vne contree fertile et plaisante,