Page:Montaigne - Essais, Didot, 1907, tome 2.djvu/642

qu’il se faisoit gendre d’vn homme qui l’auoit fait coqu, et que luy-mesme auoit accoustumé d’appeller Egysthus. Il entretint outre tout ce nombre, Seruilia sœur de Caton, et mere de Marcus Brutus, dont chacun tient que proceda cette grande affection qu’il portoit à Brutus par ce qu’il estoit nay en temps, auquel il y auoit apparence qu’il fust issu de luy. Ainsi i’ai raison, ce me semble, de le prendre pour homme extremement addonné à cette desbauche, et de complexion tres-amoureuse. Mais l’autre passion de l’ambition, dequoy il estoit aussi infiniment blessé, venant à combattre celle là, elle luy fit incontinent perdre place.Me ressouuenant sur ce propos de Mehemed, celuy qui subiugua Constantinople, et apporta la finale extermination du nom Grec ie ne sçache point où ces deux passions se trouuent plus egalement balancécs : pareillement indefatigable ruffien, et soldat. Mais quand en sa vie, elles se presentent en concurrence I’vne de l’autre, l’ardeur querelleusc gourmande tousiours l’amoureuse ardeur. Et ceste-cy, encore que ce fust hors sa naturelle saison, ne regaigna pleinement l’authorité souueraine, que quand il se trouua en grande vieillesse, incapable de plus soutenir le faix des guerres.Ce qu’on recite pour vn exemple contraire de Ladislaus Roy de Naples, est remarquable : Que bon capitaine, courageux, et ambitieux, il se proposoit pour fin principale de son ambition, l’execution de sa volupté, et iouissance de quelque rare beauté. Sa mort fut de mesme. Ayant rengé par vn siege bien poursuiuy, la ville de Florence si à destroit, que les habitants estoient apres à composer de sa victoire il la leur quitta pourucu qu’ils luy liurassent vne fille de leur ville dequoy il auoit ouy parler, de beauté excellente. Force fut de la luy accorder, et garantir la publique ruine par vne iniure priuée. Elle estoit fille d’vn medecin fameux de son temps ; lequel se trouuant engagé en si villaine necessité, se resolut à vne haute entreprinse. Comme chacun paroit sa fille et l’attournoit d’ornements et ioyaux, qui la peussent rendre aggreable à ce nouuel amant, luy aussi luy donna vn mouchoir exquis en senteur et en ouurage, duquel elle eust à se seruir en leurs premieres approches meuble, qu’elles n’y oublient guere en ces quartiers là. Ce mouchoir empoisonné selon la capacité de son art, venant à se frotter à ces chairs esmeuës et pores ouuerts, inspira son venin si promptement, qu’ayant