tiers, si nous nous en voulons seruir pour argument de quelque prerogatiue, ou au rebours pour tesmoignage de nostre imbecillité et imperfection comme de vray, la science de nous entre-deffaire et entretuer, de ruiner et perdre nostre propre espece, il semble qu’elle n’a pas beaucoup dequoy se faire desirer aux bestes qui ne l’ont pas.
Quando leoni
Fortior eripuit vitam leo ? quo nemore vnquam
Expirauit aper maioris dentibus apri ?
Mais elles n’en sont pas vniuersellement exemptes pourtant : tesmoin les furieuses rencontres des mouches à miel, et les entreprinses des Princes des deux armées contraires :
Sæpe duobus
Regibus incessit magno discordia motu ;
Continuóque animos vulgi et trepidantia bello
Corda licet longe præsciscere.
Ie ne voy iamais cette diuine description, qu’il ne m’y semble lire peinte l’ineptie et vanité humaine. Car ces mouuemens guerriers, qui nous rauissent de leur horreur et espouuantement, cette tempeste de sons et de cris :
Fulgur ibi ad cælum se tollit, totáque circum
Ere renidescit tellus, subtèrque virum vi
Excitur pedibus sonitus, clamoréque montes
Icti reiectant voces ad sidera mundi.
celte effroyable ordonnance de tant de milliers d’hommes armez, tant de fureur, d’ardeur, et de courage, il est plaisant à considerer par combien vaines occasions elle est agitée, et par combien legeres occasions esteinte.
Paridis propter narratur amorem
Græcia Barbariæ diro collisa duello.
Toute l’Asie se perdit et se consomma en guerres pour le macquerellage de Paris. L’enuie d’vn seul homme, vn despit, vn plaisir, vne ialousie domestique, causes qui ne deuroient pas esmouuoir deux harangeres à s’esgratigner, c’est l’ame et le mounement de tout ce grand trouble. Voulons nous en croire ceux mesmes qui en sont les principaux autheurs et motifs ? Oyons le plus grand, le plus victorieux Empereur, et le plus puissant qui fust onques, se iouant et mettant en risée tres-plaisamment et tres-ingenieusement, plusieurs batailles hazardées et par mer et par terre, le sang et la vie de cinq cens mille hommes qui suiuirent sa fortune, et les forces et richesses des deux parties du monde espuisées pour le seruice de ses entreprinses :
Quod futuit Glaphyran Antonius, hanc mihi pœnam
Fuluia constituit, se quoque vti futuam.
Fuluiam ego vt futuami quid si me Manius oret
Pædicem, faciam ? non puto, si sapiam.
Aut futue, aut pugnemus, ait : quid si mihi vita
Charior est ipsa mentula ? signa canant.
I’vse en liberté de conscience de mon Latin, auecq le congé, que
