cheual : et de Cæsar, qu’en sa ieunesse monté à dos sur vn cheual, et sans bride, il luy faisoit prendre carrière les mains tournées derrière le dos. Comme nature a voulu faire de ce personnage et d’Alexandre deux miracles en l’art militaire, vous diriez qu’elle s’est aussi efforcée à les armer extraordinairement : car chacun sçait, du cheual d’Alexandre Bucefal, qu’il auoit la teste retirant à celle d’vn toreau, qu’il ne se souffroit monter à personne qu’à son maistre, ne peut estre dressé que par luy mesme, fut honoré après sa mort, et vue ville bastie en son nom. Cæsar en auoit aussi vn autre qui auoit les pieds de deuant comme vn homme, ayant l’ongle coupée en forme de doigts, lequel ne peut estre monté ny dressé que par Cæsar, qui dédia son image après sa mort à la déesse Venus.
Ie ne démonte pas volontiers quand ie suis à cheual : car c’est l’assiette, en laquelle ie me trouue le mieux et sain et malade. Platon la recommande pour la santé : aussi dit Pline qu’elle est salutaire à l’estomach et aux iointures. Poursuiuons donc, puis que nous y sommes.On lit en Xenophon la loy deffendant de voyager à pied, à homme qui eust cheual. Trogus et Iustinus disent que les Parthes auoient accoustumé de faire à cheual, non seulement la guerre, mais aussi tous leurs affaires publiques et priuez, marchander, parlementer, s’entretenir, et se promener : et que la plus notable différence des libres, et des serfs parmy eux, c’est que les vns vont à cheual, les autres à pied : institution née du Roy Cyrus.
Il y a plusieurs exemples en l’histoire Romaine, et Suétone le remarque plus particulièrement de Cæsar, des Capitaines qui commandoient à leurs gens de cheual de mettre pied à terre, quand ils se trouuoient pressez de l’occasion, pour ester aux soldats toute espérance de fuite, et pour l’aduantage qu’ils esperoient en cette sorte de combat : quo, haud duhiè, superat Romanus, dit Tite Liue. Si est-il, que la première prouision, dequoy ils se seruoient à brider la rébellion des peuples de nouuelle conqueste, c’estoit leur oster armes et cheuaux. Pourtant voyons nous si souuent en Cæsar : arma proferri, iumenta produci, absides dari iuhet. Le grand Seigneur ne permet auiourd’huy ny à Chrestien, ny à Iuif, d’auoir cheual à soy, sous son empire.Noz ancestres, et notamment du temps de la
