tinent quelque homme de ville. Elles estoient demeurées en partage aux médecins et aux chirurgiens : et quoy qu’vn chacun fust à peu près vestu de mesme, si y auoit-il d’ailleurs assez de distinctions apparentes, des qualitez des hommes. Combien soudainement viennent en honneur parmy nos armées, les pourpoins crasseux de chamois et de toille ; et la pollisseure et richesse des vestements à reproche et à mespris ? Que les Roys commencent à quitter ces despences, ce sera faict en vn mois sans edict, et sans ordonnance ; nous irons tous après. La loy deuroit dire au rebours, Que le cramoisy et l’orfeuerie est défendue à toute espèce de gens, sauf aux basteleurs et aux courtisanes.De pareille inuention corrigea Zeleucus, les meurs corrompues des Locriens. Ses ordonnances estoient telles : Que la femme de condition libre, ne puisse mener après elle plus d’vne chambrière, sinon lors qu’elle sera yure : ny ne puisse sortir hors la ville de nuict, ny porter loyaux d’or à l’entour de sa personne, ny robbe enrichie de broderie, si elle n’est publique et putain : que sauf les ruffiens, à homme ne loise porter en son doigt anneau d’or, ny robbe délicate, comme sont celles des draps tissus en la ville de Milet. Et ainsi par ces exceptions honteuses, il diuertissoit ingénieusement ses citoyens des superfluitez et délices pernicieuses. C’estoit vne tres-vtile manière d’attirer par honneur et ambition, les hommes à leur deuoir et à l’obéissance.
Nos Roys peuuent tout en telles reformations externes : leur inclination y sort de loy. Quicquid principes faciunt, præcipere videntur. Le reste de la France prend pour règle la règle de la Cour. Qu’ils se desplaisent de cette vilaine chaussure, qui montre si à descouuert nos membres occultes : ce lourd grossissement de pourpoins, qui nous faict tous autres que nous ne sommes, si incommode à s’armer : ces longues tresses de poil efféminées : cet vsage de baiser ce que nous présentons à nos compaignons, et nos mains en les saluant : cérémonie deuë autresfois aux seuls Princes : et qu’vn Gentil-homme se trouue en lieu de respect, sans espée à son costé, tout esbraillé, et destaché, comme s’il venoit de la garderobbe : et que contre la forme de nos pères, et la particulière liberté de la Noblesse de ce Royaume, nous nous tenons descouuerts bien loing autour d’eux, en quelque lieu qu’ils soyent : et comme autour d’eux, autour de cent autres ; tant nous auons de tiercelets
