les bras et les Ïambes hors de la presse ; leur ame, leur intention, y demeure engagée plus que iamais.
Ils se sont seulement reculez pour mieux sauter, et pour d’vn plus fort mouuement faire vne plus viue faucée dans la trouppe.Vous plaist-il voir comme ils tirent court d’vn grain ? Mettons au contrepoix, l’aduis de deux philosophes, et de deux sectes tres-differentes, escriuans l’vn à Idomeneus, l’autre à Lucilius leurs amis, pour du maniement des affaires et des grandeurs, les retirer à la solitude. Vous auez, disent-ils, vescu nageant et flottant iusques à présent, venez vous en mourir au port. Vous auez donné le reste de vostre vie à la lumière, donnez cecy à l’ombre. Il est impossible de quitter les occupations, si vous n’en quittez le fruit ; à cette cause desfaictes vous de tout soing de nom et de gloire. Il est danger que la lueur de voz actions passées, ne vous esclaire que trop, et vous suiue iusques dans vostre tanière. Quittez auecq les autres voluptez, celle qui vient de l’approbation d’autruy. Et quant à vostre science et suffisance, ne vous chaille, elle ne perdra pas son effect, si vous en valez mieux vous mesme. Souuienne vous de celuy, à qui comme on demandast, à quoy faire il se pénoit si fort en vn art, qui ne pouuoit venir à la cognoissance de guère de gens : l’en ay assez de peu, respondit-il, l’en ay assez d’vn, l’en ay assez de pas vn. Il disoit vray : vous et vn compagnon estes assez suffisant théâtre l’vn à l’autre, ou vous à vous-mesmes. Que le peuple vous soit vn, et vn vous soit tout le peuple. C’est vne lâche ambition de vouloir tirer gloire de son oysiueté, et de sa cachette. Il faut faire comme les animaux, qui effacent la trace, à la porte de leur tanière. Ce n’est plus ce qu’il vous faut chercher, que le monde parle de vous, mais comme il faut que vous parliez à vous-mesmes. Retirez vous en vous, mais préparez vous premièrement de vous y receuoir : ce seroit folie de vous fier à vous mesmes, si vous ne vous sçauez gouuerner. Il y a moyen de faillir en la solitude, comme en la compagnie : iusques à ce que vous vous soyez rendu tel, deuant qui vous n’osiez clocher, et iusques à ce que vous ayez honte et respect de vous mesmes, obuersentur species honestæ animo : presentez vous tousiours en l’imagination Caton, Phocion, et Aristides, en la présence desquels les fols mesme cacheroient leurs fautes, et
