Page:Montaigne - Essais, Didot, 1907, tome 1.djvu/248

sort plus aiguë et plus forte : ainsi me semble il que la sentence pressée aux pieds nombreux de la poésie, s’eslance bien plus brusquement, et me fiert d’vne plus viue secousse.Quant aux facultez naturelles qui sont en moy, dequoy c’est icy l’essay, ie les sens flechir sous la charge : mes conceptions et mon iugement ne marche qu’à tastons, chancelant, bronchant et chopant : et quand ie suis allé le plus auant que ie puis, si ne me suis-ie aucunement satisfaict. Ie voy encore du pais au delà : mais d’vne veüe trouble, et en nuage, que ie ne puis demesler. Et entreprenant de parler indifféremment de tout ce qui se présente à nia fantasie, et n’y employant que mes propres et naturels moyens, s’il m’aduient, comme il faict souuent, de rencontrer de fortune dans les bons autheurs ces mesmes lieux, que i’ay entrepris de traiter, comme ie vien de faire chez Plutarque tout présentement, son discours de la force de l’imagination : à me recognoistre au prix de ces gens là, si foible et si chetif, si poisant et si endormy, ie me fay pitié, ou desdain à moy mesmes. Si me gratifie-ie de cecy, que mes opinions ont cet honneur de rencontrer souuent aux leurs, et que ie vays au moins de loing après, disant que voire. Aussi que i’ay cela, que chacun n’a pas, de cognoistre l’extrême différence d’entre-eux et moy : et laisse ce neant-moins courir mes inuentions ainsi foibles et basses, comme ie les ay produites, sans en replastrer et recoudre les defaux que cette comparaison m’y a descouuert.Il faut auoir les reins bien fermes pour entreprendre de marcher front à front auec ces gens là. Les escriuains indiscrets de nostre siècle, qui parmy leurs ouurages de néant, vont semant des lieux entiers des anciens autheurs, pour se faire honneur, font le contraire.. Car cett’ infinie dissemblance de lustres rend vn visage si pasle, si terni, et si laid à ce qui est leur, qu’ils y perdent beaucoup plus qu’ils n’y gaignent.C’estoient deux contraires fantasies. Le Philosophe Chrysippus mesloit à ses liures, non les passages seulement, mais des ouurages entiers d’autres autheurs : et en vn la Medee d’Eurypides : et disoit Apollodorus, que, qui en retrancheroit ce qu’il y auoit d’estranger, son papier demeureroit en blanc. Epicurus au rebours, en trois cents volumes qu’il laissa, n’auoit pas mis vue seule allégation.Il m’aduint l’autre iour de tomber sur vn tel passage : l’auois trainé languissant après des parolles Françoises,