leur vie ; pour faire croire qu’ilz sont bien aduertis, et qu’il ne se peut rien entreprendre dequoy ils ne sentent le vent. Le Duc d’Athènes fit plusieurs sottises en l’establissement de sa fresche tyrannie sur Florence : mais cette-cy la plus notable, qu’ayant receu le premier aduis des monopoles que ce peuple dressoit contre luy, par Mattheo dit Morozo, coniplice d’icelles, il le fit mourir, pour supprimer cet aduertissement, et ne faire sentir, qu’aucun en la ville s’ennuïast de sa domination.Il me souuient auoir leu autrefois l’histoire de quelque Romain, personnage de dignité, lequel fuyant la tyrannie du Triumuirat, auoit eschappé mille fois les mains de ceux qui le poursuiuoyent, par la subtilité de ses inuentions. Il aduint vn iour, qu’vne troupe de gens de cheual, qui auoit charge de le prendre, passa tout ioignant vn halier, où il s’estoit tapy, et faillit de le descouurir. Mais luy sur ce point là, considérant la peine et les difficultez, ausquelles il auoit desia si long temps duré, pour se sauuer des continuelles et curieuses recherches, qu’on faisoit de luy par tout, le peu de plaisir qu’il pouuoit espérer d’vne telle vie, et combien il luy valoit mieux passer vne fois le pas, que demeurer tousiours en cette transe, luy-mesme les r’appella, et leur trahit sa cachette, s’abandonnant volontairement à leur cruauté, pour oster eux et luy d’vne plus longue peine. D’appeller les mains ennemies, c’est vn conseil vn peu gaillard : si croy-ie, qu’encore vaudroit-il mieux le prendre, que de demeurer en la fieure continuelle d’vn accident, qui n’a point de remède. Mais puis que les prouisions qu’on y peut apporter sont pleines d’inquiétude, et d’incertitude, il vaut mieux d’vne belle asseurance se préparer à tout ce qui en pourra aduenir ; et tirer quelque consolation de ce qu’on n’est pas asseuré qu’il aduienne.
CHAPITRE XXIIII.
e me suis souuent despité en mon enfance, de voir és comedies
Italiennes, tousiours vn pedante pour badin, et le surnom de
magister, n’auoir guère plus honorable signification parmi nous.
Car leur estant donné en gouuernement, que pouuois-ie moins faire
que d’estre ialoux de leur réputation ? Ie cherchois bien de les excuser
par la disconuenance naturelle qu’il y a entre le vulgaire, et
