Ne tôt taire ne tôt conter (f. 2)
Quer a ennui porreit monter
A reconter lor assemblées
Ne lor agaiz ne lor meslées,
Mais mainte lance i ont bruis[i]ée
& mainte targe depeciée
E mainte broingne ensanglantée
E meinte alme de cors gitée
E maint boin cheval [i]er de pris
I out navré ou mort ou pris,
Mainte dame veve frarine
E mainte pucele orphanine,
Qui pu[i]s alérent a hontaige
Par suffrete de mariage.
Esi fu, esi l’estut estre. (1141)
L’empereriz asist Vincestre.
Ove lui fu li Mareschas
Qui tuz diz fu ver lui loi[a]ls,
E des autres baruns asés
Out entor la vile amasez
Qui la cité quidoent prendre ;
Mais dedenz avoit por defendre
Bons cheval[i]ers e gent hardie
Qui por faire chevalerie
S’en issoient chascun jor fors
Por tornïer a cels defors ;
Mais Phelippe de Columbiers
I esteit toz dis as prem[i]ers ;
153 Ne toit. — 154 enenui. — 161 mainte. — 162 naufré. — 163 veve, ms. uine. — 165. Que. — 168 empiz (avec p barré) ; de même ailleurs. — 179. Columbeirs.
