Amer poez en itel guise
Car bien est vostre amur assise ;
Ki ma Dame vaureit amer,
Mut devreit bien de li penser ;
Cest amurs sereit covenable,
Si vus amdui feussez estable,
Vus estes biax è ele est bele ;
Il respundi à la Pucele :
Jeo sui de tel amur espris
Bien me purrat turner à pis
S’or n’en ai sucurs è aïe ?
Cunseillez me, ma duce amie,
Ke ferei-jou de ceste amur ?
La Meschine par grant duçur,
Ad le Chevalier conforté,
E de s’aïe aséuré,
De tuz les riens qu’ele pout feire ;
Mut ert curteise è deboneire.
Quant la Dame ad la messe oïe,
Arière vait, pas ne s’ublie ;
Saver voleit que cil feseit
Se il veilleit, u il dormeit,
Pur ki amur ses quers ne fine ;
Avant apelat la Meschine.
Al Chevalier la feit venir ;
Bien li purat tut à leisir,
Mustrer è dire sun curage,
Fust li à preu u à damage.
Page:Marie de France - Poésies, éd. Roquefort, I, 1820.djvu/98
Cette page a été validée par deux contributeurs.
82
LAI DE GUGEMER.
