De-ci là que il repairout,
Hume ne feme ni venist,
Ne fors de cel muraill n’issist.
Uns vix Prestres blans et floriz,
Guardout la clef de cel postiz ;
Le plus bas menbre aveit perdu
Autrement n’i fu pas créu :
Le servise Diu li diseit
Et à sun mengier la serveit.
Cel jur méisme ainz relevée
Fu la Dame el vergié alée ;
Dormi aveit après mengier,
Si s’est alée esbanoier :
Ensanble od li eut la Mescine,
Gardent à-val lès la marine,
La neif virent qui vint singlant[1],
Si cum li flos veneit muntant ;
Ne veient rien qui la cunduie.
La Dame vout tuner en fuie,
S’el ad paor n’est pas merveille,
La face l’en devint vermeille[2].
Mès la Meschine ki fu sage,
È plus hardie de curage,
La recunforte et aséure ;
Cele part vunt grant aléure :
Son mantel oste la Pucele,
Entre en la neif qui mult fu bele,
Ni trovat nule rien vivant,
Page:Marie de France - Poésies, éd. Roquefort, I, 1820.djvu/84
Cette page a été validée par deux contributeurs.
68
LAI DE GUGEMER.
