Bende sa plaïe fermement.
Puis est muntez, d’ileuc se part,
K’eslongiés soit mult li est tart ;
Ne volt ke nus des suens i vienge,
Ke desturnast et ki detienge.
Le travers del’ bois est alez,
Un vert chemin ki l’ad menez
Fors de la launde enmi la plaigne,
Voit la faloise et la muntaigne.
D’une ewe ki desuz cureit,
Braz fu de mer, hafne i aveit ;
El hafne out une sule nef
Dunt Gugemer counut le tref :
Mult bien esteit aparilliée,
Defors è dedens ert poiée.
Nuls hum n’i pout trover jointure,
N’i out keville ne closture
Ke ne fust tute d’ébenus[1],
N’est sous ciel ors qui vaille plus[2].
Le veile esteit tute de seie,
Mult est bèle, ki la despleie ;
Li Chivaliers fu mout pensis,
Car en la terre n’u païs[3],
N’out unkes mès oï parler,
Ke nefs i pussent ariver.
Il vait avaunt, si descent jus,
A graunt anguisse munta sus ;
Dedenz quida hummes truver,
Page:Marie de France - Poésies, éd. Roquefort, I, 1820.djvu/76
Cette page a été validée par deux contributeurs.
60
LAI DE GUGEMER.
