Son cief couvri grant paour a
Li Chevalier l’asséura.
Diva, fait-il, por nient t’esfroies
Se est cose ki parler doies
Séurement parole à moi,
Por seul tant que ferme te voi,
S’en Dieu as part soiés séure
Mais que me dies t’aventure,
Par quel guise et confaitement,
Tu venis chi si soutieument.
La Meschine l’aséura,
Ses sans li mut, se li membra
Qu’ele n’estoit pas el vergier ;
Dont apiele le Chevalier.
U sui-ge ? dont fait la Meschine ?
Damoisele, au Gué de l’Espine,
U il arvient maint aventure,
Une fois bone, autre fois dure.
Hé Diex ! ce dist, com sui garie,
Sire, j’ai esté votre Amie,
Diex a oïe ma prière.
Ce fu m’aventure première
Que la nuit vint au Chevalier ;
S’Amie le court embracier,
Et il après à pié descent,
Entre ses bras souef le prent,
Par cent fois baise la Meschine,
Et puis l’assiet desous l’Espine.
