Et nus savoir ne le poroit,
Fors sol ichil ki ameroit,
La riens qu’il n’auroit à nul fuer,
Mais cil le set trestout par cuer.
Ensi parloit la Damoisiele
Et séoit sor l’erbe noviele ;
Assés fu quise et demandée,
Mais ains ne pot estre trovée.
Qu’il ne li siet cose ki vive
Tant est à s’amor ententive,
Et à plorer et à duel faire.
La nuis en vait, li jors repaire,
Et donques fu auques lassée,
Desous l’ente fu akeutée.
Li cuers un petit li tressaut,
Illuec s’endort grant bien li faut ;[1]
Ni ot pas dormi longement,
Mais je ne sai confaitement,
Qui de desous l’ente fu prise,
Et au gué de l’Espine prise,
Là ù ses amis ciers estoit,
Mais ne fu gaires k’il i soit,
Car repairiés est à l’Espine.
Dormant i troeve la Meschine,
Por la fréor cele s’esvelle,
Ne set ù en est, s’en mervelle.
- ↑ Pour fait.
