Il li respunt, n’ai point de sele.
Amis, ce dist la Dameisele,
Une sele vus presterai,
E un boin frain vus baillerai.
Cil a le cheval amené,
En la maison l’a enselé :
Graelent est desus muntés,
Parmi le burc est trespassés ;
Unes viés piax ot afulées
Que trop lungement ot portées.
Cil è celes qui l’esgardèrent,
L’escarnirent mult è gabèrent.
Tex est custume de burgeis,
N’en verrés gaires de curteis.
Il ne se prent de ce regart,
Fors de la vile aveit un gart,
Une forest grant è plénière,
Parmi cureit une rivière :
Cele part ala Graelent,
Très pensix, mornes è dolent.
N’eut gaires par le bos erré,
En un boisson espés ramé
Voit une Bisse tute blance
Plus que n’est nois nule sor brance :
Devant lui la Bisse sailli,
Il la hua, si puinst à li.
Il ne la cunsivra jamès,
Purquant si la suit-il de près,
