Li Reis ki plus esteit grevez,
E damagiez, è encumbrez,
Vodrat aider à sun poeir,
E en soudées remaneir.
Ses Messages i envéïa,
E par ses lettres li manda,
Que de sun païs iert eissuz,
E en seïe esteit venuz.
Mès li mandast pur sun pleisir,
E s’il nel’ volust retenir,
Cunduit li dunast par sa tere,
Quant ireit ses soudées quere.
Quant li Reis oit les Messagers
Mut les ama, mut les ot chers ;
Sun Cunestable ad apelez,
E hastivement comandez,
Que cunduit li appareillast,
Ke les Barun li amenast.
Si face osteus appareillier,
U ils puissent hébergier ;
Tant lur face livrer è rendre,
Cum il vodrunt le meis despendre.
Li cunduit fut apareillez,
E pur Eliduc envéiez,
E à grant honur recéuz,
Mut par fu bien al Rei venuz.
Sun ostel fu chiés un Burgeis,
Qui mut esteit sage è curteis ;
Page:Marie de France - Poésies, éd. Roquefort, I, 1820.djvu/424
Cette page a été validée par deux contributeurs.
408
LAI D’ELIDUC.
