Ki l’aportèrent léaument ;
Par les viles ù il errouent
Set féïz le jur resposouent.
L’enfant feseient alietier
Cucher de nuvel, è baignier ;
Nurice menoent od aus,
E itant furent-il léaus,
Tant unt le dreit chemin erré,
Qu’à la Dame l’unt comandé,
El le receut s’il en fu bel,
Le brief li baille è le scel ;
Quant ele sot ki il esteit,
A merveille le chériseit,
Cil ki l’enfant eurent porté
En lur païs sunt returné.
Milun eissi fors de sa tere
En soudées pur sun pris quere,
S’Amie remist à meisun ;
Sis Pères li duna Barun ;
Un mut riche Hume del’ païs,
Mut efforcible, è de grant pris.
Quant elle sot cele aventure,
Mut est dolente à démesure,
E suvent regrete Milun
E mut dute la mesprisun
De céo que ele ot enfant,
Il le sauera de meintenant.
Lasse, fet-ele, quoi ferai !
Page:Marie de France - Poésies, éd. Roquefort, I, 1820.djvu/352
Cette page a été validée par deux contributeurs.
336
LAI DE MILUN.
