Qant ele eut unques, plus aveir
E plus poisçance et plus saveir ;
Ne l’Emperère Octévian
N’esligascent le destre pan.
Un aigle d’or ot desus mis,
D’icel ne sai dire le pris,
Ne des cordes, ne des paisçuns,
Qui del’ tref tienent les giruns.
Sous ciel n’a Roi qui s’esligast
Pur aveir que il en dunast.
Dedenz le tref fu la Pucele,
Flurs de lis è rose nuvele,
Quant ele pert ù tans d’esté
Trespasseit-ele de biauté.
Ele jut sor un lit mult bel,
Li drap valeient un castel ;
En sa cemise sanglement,
Mut ot le cors è bel è gent.
Un cier mantel de blanc ermine
Cuvert de purpre Alissandrine,
Eut pur le caut sur li geté,
Tut eut descuvert le custé
Le vis, le col è la poitrine,
Plus ert blance que flurs d’espine.
Li Chevaliers avant ala,
E la Pucele l’apela,
Puis s’est devant le lit assis.
Lanval, dist-ele, biax amis,
Page:Marie de France - Poésies, éd. Roquefort, I, 1820.djvu/226
Cette page a été validée par deux contributeurs.
210
LAI DE LANVAL.
