Le texte de cette page a été corrigé et est conforme au fac-similé.
79
L’INQUISITEUR
Jacot.
Comment pouvez vous le jeu veoir,
Qui n’a ne forme ne colleur ?
L’Inquisiteur.
Je voy le jeu, où fourvoyez
Vous estes de faire tout bien ;
Thierrot.
Ha, vous dictes que vous voyez ;
En bonne foy, je n’en croy rien.
L’Inquisiteur.
N’ay je pas deux yeulx en la teste
Pour veoir ce qui est devant moy ?
Clèrot.
Aussi a bien, Monsieur, la beste,
Et n’a entendement ne foy.
L’Inquisiteur.
Ces parolles sont trop amères ;
Il me fault plus avant sçavoir
Qui sont leurs pères & leurs mères,
Ou je ferois maulvais debvoir.
Mon enfant, qui est vostre père ?
Donnez m’en signes apparens.
Jacot.
Le vostre.
L’Inquisiteur.
Non est ; par sainct Père,
Nous ne sommes en rien parens.
