Page:Madame de Mornay - Memoires - tome 1.djvu/57

Dieu leur bouscha les oreilles et n’y prirent point garde ; il connut assez particulièrement qu’ilz ne le connoissoient point et leur dit qu’il s’assuroit qu’ilz seroient tous trop marris de tuer ung homme pour ung autre, qu’il leur donneroit bonne congnoissance dans Paris, qu’ilz le menassent en quelque maison du fauxgbourg, l’y lessant telle garde qu’ilz vouldroient, et cependant envoyassent aucuns d’eux aux lieux qu’il nommeroit. Enfin quelques ungz moins forcenés furent de cest avis. Ils le menèrent en ung cabaret du dit fauxbourg où il feit porter à déjeusner. Les plus gracieuses paroles, c’estoient menaces de le noyer. Il fust sur le point de se jetter par une fenestre ; mais, tout considéré, se résolut de sortir de leur main par assurance, et leur offrit connoissance chez messieurs de Rambouillet, mesmes chez mons^r le cardinal leur frère, pour les esblouyr et scachant bien que gens de ceste qualité n’avoient pas accès à sy honnestes gens, comme de fait ils n’acceptèrent point ses offres. Cependant, ils l’examinèrent diversement ; le chariot de Rouen passant, le firent arrester pour savoir s’il seroit congneu de quelques ungz de ceux qui y estoient, d’aultant qu’il leur avoit dit qu’il estoit de Rouen, et n’ayant esté congneu d’iceux le concluoient menteur, et continuoyent à le vouloir noyer. Par ce aussy qu’il se disoit clerc, (comme les idiotz appellent les doctes en leur vulgaire), firent apporter ung Bréviaire pour voir s’il entendoit Latin, et voyans qu’ooy, disoient que c’estoient assés pour infecter toute la ville de Rouen et qu’il s’en falloit deffaire. Pour éviter toutes ces importunités, il leur dit qu’il ne respondroit plus