Teſmoignage certain que les celestes pleurs
Ne couuriront iamais la face de la Terre,
Comme au tans que les Eaux luy firent tant de guerre :
Voiez du Ciel amy les ſignes plus benins.
Voiez d’autre costé tant de troupeaux marins,
Et Prothé leur paſteur : ſa houlete dorée,
Paroist de bonne grace en la mer azurée.
Vraiment ce Curedent de ſi riche façon,
Vaut l’Agnelle cent fois, dont il paie rançon,
O qu’en vn petit lieu la beauté ſe voit grande !
Tel qu’il est Violier, celle qui vous commande,
Le receura de moy.
Allons donc la chercher :
Ell’est fort loing d’ici, commençons à marcher.
Quoy vous retournez donc au lieu de vostre priſe ?
Pour en estre élongné ie ne ſuis en franchiſe,
Auẞi ne veus ie point m’afranchir du pouuoir
De celle qui me tient en mon iuste deuoir.
Pendant que nous ferons un ſi plaiſant voiage,
Le Loup ſortant du bois prendra ſon aduantage :
Mais laiſſons nos troupeaux à Saugin pour garder,
