Le texte de cette page a été corrigé et est conforme au fac-similé.
NOVVELLES ŒVVRES
Aẞiſe aupres de moy, d’vne force foiblette
Preſſe mes doitz des ſiens. Car ſes douces faueurs
Me r’alument le cueur de nouuelles ardeurs.
Amy commancez donc, puis ie ſuiuray vos traces,
Chantant ma belle Fleur, & ſes gentilles graces.
CHANSON.
Viol.
Amaranthe dont les beautez
Ne ſe verront iamais ternies,
Ie ne deſire priuautez
Que de vos graces infinies.
Mes ſens l’vn de l’autre jalous
Se bruloyent en vostre lumiere,
Ores mon cors est loing de vous,
Mon ame dans vous priſonniere.
Mon œil reſſembloit vn tiſon
Qui m’eſlançoit au cueur la flame,
Mon cueur eſt plus ſeur en priſon,
En vous la priſon de mon ame.
Comme le celeſte flambeau
Nous offence la foible veüe,
Si fait vostre Soleil iumeau
Qui ne ſe voyle d’une nüe.
