Si que l’a mis hors du chemin :
Trouvei n’est pas en parchemin
N’en livre de sainte Escripture
Qu’ains mès fust si hors de mesure
Com nous le voion maintenant.
Fauvel si couche au remenant,
Que le mestre est de la griesche.
Tout le monde maine a la tresche :
Pour plus melleir et bestorneir,
Torner le fait et retorneir ;
Tant i a mis entente et cure
Qu’au jor d’ui toute creature
Est du tout tornei au contraire
De ce pour quoi Diex le vout fere.
Je le te monstre en tous estas
Par argumens non intestas,
Primes en ceulz de sainte Eglise,
Ou plus d’amor doit estre assise ;
Sans gloseüre et sans comment,
Clerement te diroi comment
Les persones de sainte Eglise
Ont vie berstornee prise.
Sans gloseir te diroi comment
Et auques asseis clerement.
Primes en ecclesiaus persones,
Qui deussent avoir taches bones,
Sanz gloseure et sanz comment
Clerement te dirai comment
Tels personnes, c’est chose clere,
Ont prise bestournee maniere.
