Cette page a été validée par deux contributeurs.
Le Bergier, entrant.
Dieu y soit ! Dieu puist advenir !
Pathelin.
Dieu te gard, compains ! Que te fault ?
Le Bergier.
On me piquera en defaut
Se je ne voys à ma journée.
Monseigneur, à de relevée.
Et, s’il vous plaist, vous y viendrez,
Mon doulx maistre ; et me defendrez
Ma cause, car je n’y sçay rien.
Et je vous payeray très-bien,
Pourtant, se je suis mal vestu.
Pathelin.
Or vien çà ? Parles ! Qui es-tu ?
Ou demandeur ? ou defendeur ?
Le Bergier.
J’ay affaire à ung entendeur
(Entendez-vous bien, mon doulx maistre ?)
A qui j’ay longtemps mené paistre
Ses brebis, et les luy gardoye.
Par mon serment ! je regardoye
Qu’il me payoit petitement…
Diray-je tout ?
