Entrels ditz els coratges els faitz atermenatz
S’asemblan las batalhas els cavaliers armatz ;
D’entr’ambas las partidas son aissi aprosmatz
Que no i es pons ni planca mas us petitz fossatz.
Cant lo coms de Foish passa el seus valens barnatz
D’entr’ambas las partidas fero doas maitatz ;
Mas n’Folcaut de Brezi tot belament rengatz
Los aten els espera ab fermas volontatz.
Lo refrims de las trompas els sonetz acordatz
Fan retendir las plassas, la ribeira els pratz,
Ez es Foish ! e Toloza ! mentaugutz e cridatz,
E Montfortz ! e Brezis ! auzitz e reclamatz.
E lai on s’encontreron ab los tens coloratz,
Ez ab las entresenhas alumnec la clartatz,
E baicheron las astas els gomfainos frezatz,
E van s’entreferir ab fis cors esmeratz
Que las astas pessian sobrels ausbercs safratz.
A tant vec vos la preischa dels baros ben armatz,
Que cels quels esperonan los an environatz,
Que sobre las feridas los an esperonatz
En Peyre W. escrida de Seguret : « Tug datz,
« Baros, al comte jove tot dreg on lo veiatz,
« Que res nom fai temensa mas la sua bontatz
« E sa cavalaria e la sua fertatz ;
« Que si no l’abatem ans quens aia sobratz
« Al partir de la guerra nos fara totz iratz. »
Ab tant venc lo coms joves denan totz abrivalz
o per vieure o per morir » (p. 107). — 9135. Dessin : La batalha del comte de Foyhs ab en Folcaut de Brezi. — 9141. Réd. en pr. Peyre Guirault de Seguret (p. 107).