« Senhors, » so ditz lo coms, « be sabetz que vers es
« Quel senher apostolis m’a lhivrat Carcasses,
« Qu’ieu capdele[s] la terra e qu’a dreit la tengues
« En aital covenensa que ja no la pergues,
« Ez ai la conquerida e la crotz e la fes.
« Ara m’es a vejaire qu’ieu sia si repres
« Que s’ieu no preng la vila ans que venga .I. mes
« Mais me valdria mort o que ja no nasques.
« Que, per santa Maria, ieu soi tant fort esmes
« Que l’avers no m’aonda nil dos nil pretz nil ces.
« E s’ieu me part del seti entro quels aia pres,
« Mens en valdra la Glieiza ez er morta la fes. »
E lo coms de Saisho li respon demanes :
« Senh’en coms de Montfort, si a Jhesu Crist plagues
« Que orgolhs fos drechura e pecatz fos merces,
« Vostra fora la vila e l’avers e l’arnes.
« Mas nom da a vejaire c’ara sia comques,
« Per so quel coms R., que es dux e marques,
« La clama per linatge, e sabem que vers es,
« E sos fils lo coms joves qu’es nebs del rei Engles ;
« E i es Roger Bernartz e lo coms Cumenges,
« Els homes de la vila, que fan semblant quels pes
« Car vos los avetz mortz e destruitz e malmes.
« Pero, si l’apostolis ni la Glieiza volgues
« Ques entre vos e lor fos acordiers ni bes,
« Per so quelh laichesatz la terra e son heres,
« Mais ne valdria Roma el crestianesmes ;
« Ez aguessatz la terra que del vescomte es.
« Pero us frugs i brolha que ditz ben que sieu’es,
— 8034. Quel, ms. Quels. — 8055. avetz, ms. anres ; cf. v. 8092. — 8058. quelh, ms. que li.
