« Senher, mal vitz Tholoza e l’autra eretat,
« Que veus mort vostre fraire e vostre filh nafrat,
« E tans baros dels autres que totz temps er plorat.
— A Dieu ! Gui, » ditz lo coms, « oi er tot acabat !
— Coms, » dit n’Ugs de Laici, « nos em tant mescabat
« C’aici pendrem martiri ; oi er tot acabat.
« C’a mi don’a vejaire que del tertz em mermat.
« Laissem aquesta guerra c’oi serem perilhat ;
« Que si gaire nos dura tuit em martiriat. »
La batalha fo granda el perilhs abdurat,
Tro li baro defora so li milhor dampnat,
Aissi que las senheiras e lo cap an virat.
E dins cridan : « Toloza ! que los matz a matatz,
« Car la crotz escarida al leo abevrat
« De sanc e de cervelas novelament temprat ;
« E lo rays de l’estela a l’escur alumnat,
« Perque Pretz e Paratges cobra sa dignitat. »
E pois dizon al comte : « Pauc avem delhivrat,
« Que la vostra merces es morta e pecatz,
« E ab vostre sobresen sabent, otracujat,
« E ab vostre mezers avetz les tan dampnat
« Que negus cambiaire non a pietz cambiat,
« Que per poges de creis son li tolza donat.
« E car bo natural senhor an recobrat
« Veus lo camp e la lebre per tot temps azinat. »
E lo coms s’en repaira ab cors trist e irat,
— 6409. La fin du vers peut bien être fautive, ici ou v. 6411. — 6416. Corr. T. dels baros ? — 6422. La suite des idées semble présenter une lacune ; p.-ê. manque-t-il un vers après celui-ci. — 6425. Corr. C’ab ? — 6426. les tan, ms. lestam. vostre mezers, corr. vostres mespres ? — 6430. Corr. V. lo can a la l. ... afinat ? cf. v. 6893.
