E corrego Agen e tota la encontreia.
A penas pot anar lor osts tan es carguea.
En Wles d’Encontre, cui so pas non agreia,
Lor es salhitz davant ab tota sa mainea.
Lai ac ferit mant colp de lansa e d’espeia
Si que la terra n’era tota essanglenteia,
E de trensos de lansas enviro lor junqueia.
Mot gloto viratz mort, sanglent, gola badeia.
Anc nols laichet d’aver que valha .Ia. denrea ;
Trastotz los desconfi ab sa gent aturea
Qu[e] el ot de Bergonha e de Fransa amenea
Sai en aquest pais.
Venquè totz los roters e lor tolc so que an pris,
E gazanhè de[l] lor e cavals e rocis.
A Castel Sarrazin corregon lo pais
Una autra vegada, mas ma fe vos plevis
C’anc del sieu non porteron valent .II. peitavis,
Ans foron descofit e se son en Tarn mis.
Son caval li nafrero de .V. dartz o de .VI. ;
En Wles d’Encontre, vezen totz sos amis.
Si es casutz en terra ; e co om afortis
Mes la man a la espea e sauta avan en pis :
En aut crida sa ensenha, aicela de Paris.
Mesira Moreus broca son bon destrier de pris,
E tuit li autri essems i vengro, so m’es vis,
A batalha mescleia, no cujan estre fis
- ↑ — 2714. La réd. en pr. confond cette nouvelle affaire avec la précédente.