L aura grand soin de bien enseigner & par paroles & par exemples à prier Dieu à ses enfans, prenant garde exactement de se trouuer aux Prieres, & regarder par tout si chacun de siens est dans la posture decente, ne badine point, notamment à l’Eglise durant la Messe & les prieres publiques de l’Ecole, & notés qu’il ne faut iamais pardonner telles impietés aux enfans, leur monstrant que c’est vne espece de sacrilege que de badiner en priant Dieu, & que c’est se mocquer de luy, ce qui est le plus grand peché que l’on puisse commettre.
L leur recommandera souuent de faire la Priere à genoux au soir & au matin, sans manquer vn seul iour auec grand respect & reuerence, & mesme chastiera ceux dont il aura aduis qu’ils y auront manqué en ayant esté par luy aduertis, il leur enseignera à la bien faire, dans les Catechismes par des comparaisons familieres, & il aura soin de leur bien apprendre à prononcer le Pater, l’Aue, le Credo, Confiteor en Latin, & en François, & aussi le Benedicite & les Prieres de l’Exercice du Chrestien : leur monstrant puisque nous croyons qu’il y a vn Dieu, tout puissant & tout bon, qu’il le faut honorer & auoir recours à luy en toutes nos necessités, auec vne grande confiance & humilité & c’est là, la veritable Esperance d’vn bon Maistre d’Escole : voyons la troisieme Vertu Theologale.