« Vous nous retrouverés droit ci. »
Agamanor a tant parti,
Qui prist congiet moult bellement,
Et les dames moult doucement
Li donnerent entre elles .ii.
Li chevaliers revint tous seulz,
Au manoir ou Bertoulès fu,
Qui demande : « Monsigneur, u
« Avés vous esté tel termin ?
« A painnes me sui je au chemin
« Mis pour encontre vous aler. » f. 160 c
Adont commença a parler
Agamanor sans detriance,
Et li recorde l’ordenance
De li et des dames ossi ;
De cief en cor li dist ensi
Que portée estoit la besongne :
« Or fault il, compains, que je songne
« Que je soie la au dit jour,
« Se jamais voel avoir honnour. »
— « Vous y serés, » dist Bertoulès,
« Sus vo cheval, armés tous près,
« Pour a .ii. chevaliers combatre.
« Se vous ne les poés abatre
« Sus le camp, par devant les dames,
« Ce vous sera uns trop grans blasmes. »
Et cilz respont, a longe alainne :
« Je m’en meterai voir en painne. »
r vous dirons des damoiselles
Qui sont jones, frices et belles,
De Luciienne et Phenonée,
Qui ont ceste cose ordenée
Qu’il faut c’Agamanor s’esprueve
A yaus .ii., c’est assés esprueve.
Page:Froissart - Méliador, tome 2.djvu/369
Le texte de cette page a été corrigé et est conforme au fac-similé.
365
Méliador
