« Et a fin que veons en voir
« Ce que vous faites a savoir,
« Que, soit ou a .i. ou a deus
« Chevaliers bien chevalereus,
« Vous vodrés vo corps esprouver,
« A fin c’on vous puist tel trouver
« Que ci nous avés mis avant,
« Nous retenons ce couvenant :
« Ma cousine premierement
« Et jou apriès secondement,
« Vous ferés ce que nous dirons. f. 160 b
« Dedens .vi. jours nous pourverons
« De .ii. chevaliers par samblance ;
« Cescuns ara espée et lance
« Et sera armés a cheval,
« Comme on doit armer .i. vassal
« Qui se voelt armer en bataille,
« Et droitement devant la baille
« De ce manoir les trouverés,
« Au jour que droit ci revenrés.
« Et se ce vous ne volés faire,
« Il vous couvient en avant taire
« A jamais retourner vers nous. »
Agamanor lors en genouls
Se jetta devant Luciienne
Et dist : « Ha ! tres bonne moiienne,
« Vous m’avés a gré bien servi.
« Onques mieus dire je ne vi,
« Et je revenrai volentiers
« Et mousterai que chevaliers
« Sui je voirement, a l’espée. »
— « Or alés, » ce dist Phenonée,
« Et si vous souviegne dou jour,
« Car nous ferons ci no sejour ;
Page:Froissart - Méliador, tome 2.djvu/368
Le texte de cette page a été corrigé et est conforme au fac-similé.
364
Méliador
