« Que je jettai ma lance jus,
« Et renouvelay au sourplus
« Les parolles dites devant :
« Chevaliers, en ce couvenant,
« Fault que vous moustrés a l’espée
« Pour quoi ne sur quele pensée
« Vous portés ceste blance dame,
« Ou je ou vous y arons blasme. »
« Et cilz me respondi en l’eure,
« Quant ses parolles je saveure,
« Qu’il le me diroit volentiers,
« Non com recreans chevaliers,
« Mais si com cargiés en estoit.
« Adonc me conta la endroit
« Comment ma dame, qui ci est
« Et de qui toute honneur me nest,
« L’avoit mis sus en ceste istance. f. 159 a
« Briefment il m’en dist l’ordenance
« Si tres bien et si sagement
« Que n’i seuisse amendement
« Mettre, ne ne saroie encor,
« Et, quant il fu venus au cor
« De son conte, je fui moult liés
« Et de respondre appareilliés.
« Se li dis : « Chevaliers tres doulz,
« Honneur tres haute porte a nous
« Vostre dame et vous autressi
« Qui portés ma devise ci ;
« Gré vous en sçai et li trop plus.
« Or ne le metés jamais jus
« Pour homme nul qui le calenge,
« Et si m’en rendés grant loenge
« A vo dame, quant le verés ;
« Et par tout la ou vous serés
« Et serai, saciés pour certain,
« Soit lance ou espée en ma main
Page:Froissart - Méliador, tome 2.djvu/363
Le texte de cette page a été corrigé et est conforme au fac-similé.
359
Méliador
