« Si n’en sçai dire, de ma part,
« Se cilz rondelès, qui se part
« De vo bouche, fu la chantés. »
Respont Phenonée : « Entendés.
« Oïl, cousine, il a raison,
« Car je l’avoie en la saison
« Devant apris, si m’aÿt Diex. »
Ce dist Luciienne : « Or vault mieulz. »
Adont moult bellement regarde
Sus le chevalier, qui la darde
D’amours dedens le coer portoit ; f. 158 c
Si dist : « Biau sire, et se c’estoit
« Vostre aise et la vostre ordenance,
« Nous vodrions a vo plaisance
« Oïr le rondelet second,
« Car saciés que telz coses sont
« Moult plaisans, tant c’a l’escouter,
« Et poeent forment pourfiter. »
Lors respondi li chevaliers :
« Certes, dame, moult volentiers
« Le dirai, car bien le retins
« Et assés tost apriès revins
« Ens ou bois, ou logiés estoie. »
Adont Agamanor en joie
Recorda la le rondelet.
Telz qu’il est, c’est raisons c’on l’et.
Pour quoi avés vous nulle doubte
De moy, mon chier ami tres doulz ?
J’ay mis en vous m’entente toute,
Pour quoi, etc.