Tourna ce parler a huiseuse,
Car point ne sentoit la matere,
Et dist ensi : « Or ça, biau frere,
« Vous serés paiiés largement
« Pour l’un et l’autre vraiement,
« Car je scai moult bien c’on vous doit. »
Lors tent la main et cilz, qui voit f. 154 b
De Phenonée l’ordenance,
Doucement en le main li lance,
Et celle erranment le desploie.
Si le regarde et a grant joie
Des .ii. images qui ens sont
Et des contenances que font.
Si dist : « Mestres, c’est bien ouvré ;
« Mais voelliés me dire en secré :
« Cognissiés vous ce chevalier,
« Pour qui droit ci et avant hier,
« Sus son estat et son afaire,
« Vous avés peüt tout ce faire ? »
— « Oïl, ma dame, pour certain.
« Otretant que mon corps je l’aim. »
Et quant Phenonée ot ce mot,
.I. peu d’esbahissement ot,
Et li souvint de sa cousine
Qui li ot dit par grant doctrine,
En considerant les raisons,
Que cilz estoit folz ou frans homs,
Qui avoit pourtrait cel ouvrage.
Adonques la douce et la sage,
Pour mieulz Agamanor attraire,
Dist ensi : « Et que voet cilz faire,
« Qui telement se represente
« Par ceste figure presente ?
« Bien sçai qu’il vainqui le tournoy,
« Et cuidai de puis, par ma foy,
« Qu’il fust Melyador, mon frere ;
Page:Froissart - Méliador, tome 2.djvu/344
Le texte de cette page a été corrigé et est conforme au fac-similé.
340
Méliador
