« Li pointres, et se dist que nulz
« Ne nulle, tant soit de parage,
« Ne vera fors vous son ouvrage.
« Se dist il que c’est bonne cose. »
Et Phenonée, qui point n’ose
Tenir la parole en secré,
Pour servir sa cousine a gré,
Dist ensi : « Or va, et l’amainne. »
Celle se part, et sa germainne f. 154 a
Fait Phenonée a brief parler
Dedens une gourdine aler,
Et li dist : « Tenés vous droit la,
« Car cilz de l’autrier revenra ;
« Ja est il en ceste maison. »
Adont li dist sus quel raison
Sa camberiere estoit venue.
Luciienne qui se remue
De son pas, sans point de response,
En une gourdine s’esconse.
Evous Agamanor qui vient
Et ce qu’il porte en sa main tient.
Si salue biel Phenonée
Et celle, com bien ordenée,
Son salut li rent doucement.
A Valiienne dist : « Va t’ent.
« Laisse nous ci, moy et ce mestre. »
Elle se part ; au lés senestre
S’est trais. Aghamanor, en l’eure,
En parlant grandement honneure
Phenonée la et l’encline
Et dist : « Ma dame, a bonne estrine,
« Je vous rapporte .i. peu d’ouvrage,
« Le quel j’ai fait de bon corage,
« Car voir il me touche moult fort. »
Phenonée, qui oultre bort
Estoit courtoise et gratïeuse,
Page:Froissart - Méliador, tome 2.djvu/343
Le texte de cette page a été corrigé et est conforme au fac-similé.
339
Méliador
