« Ne quel samblant cilz homs peut faire,
« Quant on li delivra deniers. »
Et ceste respont : « Volentiers ; »
« Mandée soit. » Lors fu mandée
La camberiere, qui senée
Fu de respondre a ses .ii. dames,
Car la ne li touchoit nulz blasmes. f. 152 b
uciienne moult doucement
Le mist a parolle en present
Et dist : « Valiienne, entendés.
« Cilz mestres, qui s’en est ralés,
« Quel cose dist il au partir ?
« Par samblant li peut bien souffir
« Ce c’on li donna a l’estrine. »
— « Ma dame, » dist ceste, « .i. grant signe
« Vi en li que, dedens brief jour,
« Il se mettera au retour,
« Car de vos deniers ne fist compte. »
Et quant Luciienne ot ce compte,
Si respondi sus : « Et comment ?
« Ne prist il donques point d’argent ? »
— « Par Dieu, non », respont Valiienne.
— « Or me dittes, » respont Luciienne,
« Quel samblant il faisoit a l’eure
« C’avoecques vous fist son demeure ? »
— « Certes, ma dame, il estoit mas
« Et regardoit dont hault, puis bas,
« Ensi qu’une personne fole.
« Ja n’en euisse eü parole
« Se vers li me volsisse taire,
« Et disoit qu’il n’avoit que faire
« Ne de boire, ne de mangier.
« En cel estat sans li bougier
« Li vi jou bien heure et demie. »
Page:Froissart - Méliador, tome 2.djvu/336
Le texte de cette page a été corrigé et est conforme au fac-similé.
332
Méliador
