« Autrement ma dame, pour voir,
« S’en tenroit a trop mal paiie. »
— « Point n’en arai a ceste fie, »
Respont Agamanor briefment.
« Je revenrai procainnement,
« Si serai paiiés tout ensamble. »
La camberiere, ce me samble,
Ne le voelt adont plus presser ;
Bellement le laia aler
Et l’aconvoia hors de l’uis.
Agamanor revint de puis f. 151 d
Tout a piet par devers Tarbonne,
Et saciés que bien il s’ordonne
Qu’il revenra une aultre fois.
De la camberiere, c’est drois,
Et des dames nous parlerons.
Quant Agamanor, cilz frans homs,
Fu partis, que point ne cognoissent,
Les .ii. damoiselles s’aquoisent,
Phenonée, ossi Luciienne,
Sans avoir moiien ne moiienne.
En une cambre sont encloses ;
Cascune ot .i. capiel de roses
Sus son chief moult liement mis.
La fu li draps, dont je devis,
Desploiiés et bien regardés.
Luciienne, c’or m’entendés,
L’imaginoit d’aultre façon
De Phenonée, et en quel non
On l’avoit apporté droit la.
Luciienne adont en parla
A sa cousine et dist ensi :
« Certes, cousine, cilz draps chi
« Est gentement fais et ouvres ;
« Mais je vous pri, considerés
« Les afaires de vo gent corps.
Page:Froissart - Méliador, tome 2.djvu/334
Le texte de cette page a été corrigé et est conforme au fac-similé.
330
Méliador
