« Que vous alés, coi que tres fins
« Amans et chevaliers soiiés.
« Il fault que vous vous avoiiés
« Par aultre adrece au dit manoir ;
« Plus grant sens y couvient avoir
« De premiers que chevalerie. »
Et lors en sa merancolie
Aghamanor si se reboute,
Et y met sen entente toute
D’estudiier pour le millour
Comment, par pais et par honnour,
Il puist parler a Phenonée.
Tant a sa besongne ordonnée
Et tant visé par mos exprès
Que briefment il en est moult près.
Et quant a son varlet l’a dit, f. 148 b
De noient ne li contredit,
Mais dist : « Vous estes en la voie
« Et, se mieulz dire vous savoie,
« Je le feroie volentiers. »
Che que li rouges chevaliers
Avisa, je le vous dirai,
Ne ja mot je n’en mentirai.
l est bien voirs c’Agamanors,
Qui en grant pensée estoit lors.
Vous savés bien sur quel adrece,
Avoit eü en sa jonece
Imagination moult grande,
Vous l’orés, s’on le me demande,
A pourtraire et faire figures,
Si bien, si belle[s], et si pures
Et de si tres bonne façon,
Que on n’i seuist par raison
Apriès li noient c’amender.
Page:Froissart - Méliador, tome 2.djvu/320
Le texte de cette page a été corrigé et est conforme au fac-similé.
316
Méliador
