Qui une nervure encontra,
Par quoi elle ne peut riens faire,
Damage porter ne contraire
Au chevalier au soleil d’or.
Et quant ce voit Melyador
Que ses ennemis si le quoite,
Jeuer le voelt d’une aultre emploite,
Sus le costé s’est trais vers li,
Et Housagres se descouvri
Quant il le vit vers soi venant.
Melyador ou couvenant
Bel et bien l’ala embracier
Parmi le col, sans espargnier ;
La y ara luite moult forte,
Car jus a la terre le porte.
Les las dou hÿaume li trence.
Ne li voelt faire longe crence ;
Il dist qu’il li todra la teste
S’il n’obeïst a sa requeste.
Messires Housagres se voit
En peril, et si ne savoit
Que Melyador li voelt faire ;
Siques pour eschiewer contraire,
Il dist : « Chevaliers, je me rens f. 140 a
« Et vous jure dessus ces rens
« A tenir ce que vous dirés. »
Adont est arrier retirés
Melyador, qui prent l’espée
Dou chevalier sans demorée
Et dist : « Chevaliers, je t’ordonne
« A ci demorer en ta gonne,
« Sans armeüres, ne cheval,
« A garder ce passage aval
« Pour tous chevaliers qui venront
« Et qui par ci passer vorront.
« Tu leur seras apparilliés
Page:Froissart - Méliador, tome 2.djvu/287
Le texte de cette page a été corrigé et est conforme au fac-similé.
283
Méliador