n jour jetta au lonc ses yex
Melyador, li tres gentieulz ;
Regarde et voit vers li venant,
En moult simple et bas couvenant
.I. escuier moult mal monté
Li quelz menoit pour verité
D’encoste li une littiere.
Melyador onques la chiere
N’en osta, ne les yex ossi.
Si fu venus jusqu’a cesti,
Le quel moult bel il salua ;
Et en apriès li demanda
Ou il aloit et dont venoit,
Et quel cose estoit qu’il tenoit.
Et cilz, qui faisoit mate ciere,
Li dist : « Sire, en ceste litiere
« Gist mon signeur tres fort navrés.
« Jamais ne sera recouvrés
« Pour ses amis cilz grant meschiés, f. 138 c
« Et vous di que vous approciés
« Durement chiaus qui ce ont fait. »
Adont li recorde le fait
De point en point ; comment il va
De son signeur qui arriva
Sus les Irois a povre estrine.
Et li dist moult bien qu’il chemine
Ou cil sont qui ont en leur garde
Le passage c’on dist la Garde,
Sur la riviere de Clarense.
Quant Melyador l’ot, si pense
.I. petit, et puis li demande
S’on entre par la en Irlande,
Et cilz respont : « Oïl, sans doubte ;
« Mais au passage c’on redoubte
« Sont doi chevalier grant et fort,
Page:Froissart - Méliador, tome 2.djvu/281
Le texte de cette page a été corrigé et est conforme au fac-similé.
277
Méliador