Et au chevalier revenrons
Que sa serour, cui Diex doinst joie,
A mis en ceste année en voie
Pour oïr nouvelles de li.
Le chevalier friche et joli,
Monsigneur Lyone on l’appelle,
Tous seulz chevaucoit sus sa selle,
Sans varlet et sans escuier ;
Nous dirons le Blanc Chevalier,
Car ensi se faisoit nommer.
Cilz s’ala en soi aviser,
Pour le tournoi de Signandon
Ou veü ot donner le don
Dou pris, l’espée, au mieulz faisant,
Que, vers sa dame au corps plaisant,
A Tarbonne retourneroit,
Et bellement li conteroit
L’aventure de la journée
Et ossi tout ce qu’en l’anée
Avoit veü, puis qu’il parti.
Li chevaliers, sus ce parti,
S’est prestement mis au retour.
Tant fist et tant ala c’un jour
E[s]t a Tarbonne revenus.
Il fu grandement bien venus
De sa dame, ce fu raison. f. 136 c
Lors qu’il entra en la maison,
Ce fu .i. venredi moult main,
Sa dame le prist par la main
Et li demanda des nouvelles :
« Ma dame, s’en sçai moult de belles,
« Mais que de toutes me souviegne.
« Et, afin que mieux y aviegne,
« Vous savés bien sur quel parti
« Une fois de vous me parti,
« Pour aler en cesti voiage,
Page:Froissart - Méliador, tome 2.djvu/273
Le texte de cette page a été corrigé et est conforme au fac-similé.
269
Méliador