Ja y ara jouste moult belle.
Cescuns vient dessus la praelle,
Acourant par moult grant randon,
Et se fierent en abandon
Des lances dessus les escus.
Li plus fors des .ii. est fendus,
Car li fier furent aceré.
Melyador a encontré
Monsigneur Buïn par tel voie
Que jus a terre le convoie.
Li chevaus fuit ; Buïn demeure,
Qui lors est relevés en l’eure
Et trait l’espée incontinent.
Melyador, qui son tour prent,
Perçoit ensi qu’il se retourne
Ledit chevalier qui s’atourne
Pour venir a piet, contre li.
Lors se doubta, je vous affi,
Melyador de son cheval
Que cilz ne li porta grant mal ;
Si descendi tantost a terre.
L’espée trette vint requerre
Le chevalier qui grant samblant f. 135 b
Fait que de la venir avant.
r sont tout doi li chevalier
Devant le porte en mi l’erbier
Et tiennent les espées nues.
Evous de premieres venues
Qu’il se donnent grans horïons.
Cilz Buïns estoit grans et lons
Et chevaliers de bonne taille ;
Mais plus savoit de la bataille
Melyador que tel quarante.
Page:Froissart - Méliador, tome 2.djvu/268
Le texte de cette page a été corrigé et est conforme au fac-similé.
264
Méliador