A .ii., ou a .iii. ou a quatre
Et ne demandoit aultre cose,
Incontinent plus ne repose
Et dist qu’il s’en voelt hors issir,
Ne point ne l’en poet rastenir
La dame par nesune voie.
Car jamais, ce dist, n’aroit joie
Se on li pooit reprocier
Que la euist .i. chevalier
Qui les armes li demandast,
Et tantost contre li n’alast.
Sa brongne viest incontinent ;
Bien s’est armés a son talent.
En la court vint, que plus n’arreste ;
Sa lance li fu toute preste.
Sitost c’ou cheval montés fu,
Lansonnès li mist son escu
A son devoir bien et a point,
Et puis li lace et se li joint
Le hÿaume pres de la teste.
Cil de laiens en font grant feste,
Quant en si grant desir le voient ;
Jusc’a la porte le convoient,
Qui fu incontinent ouverte.
Au dehors fu a la couverte
Messires Buïns qui l’attent, f. 135 a
Et si tost que venu le sent,
Ensi comme bons chevaliers
Tres oultrageus, hardis et fiers,
Sa lance met a son devoir
Et dist que il vodra savoir
Comment la dame est pourveüe
De chevalier. Adont argüe
Le cheval pour aler avant.
Melyador, qui au devant
De li se met par ordenance,
Page:Froissart - Méliador, tome 2.djvu/267
Le texte de cette page a été corrigé et est conforme au fac-similé.
263
Méliador