« De qui j’aie la cognissance,
« Ens ou quel j’ay plus grant fiance
« Qu’il venra a s’entention
« De la queste ; car de renom
« D’armes et de chevalerie
« Passe tous aultres, quoi c’on die.
« Et, biau sire, tres grans mercis,
« Quant en tel point vous estes mis
« Que vous m’avés dit et conté
« Dou chevalier la verité. »
A ces parlers la congiet prent,
Et puis au chevalier entent
Le chemin de Norchombrelande.
Or esçou drois c’on me demande
De monsigneur Melyador ;
Comment il chevauce des or
Avoecques les .ii. damoiselles,
Qui sont jones, frices et belles,
Le chemin par devers Norcgalles.
Faire ne vous voel intervalles.
Tant ont chevaucié et erré
Qu’il sont en Norgales entré
Et venu jusques ou chastiel
De Valerne, ou ot maint crestiel.
Arresté se sont a la porte ;
Li forestiers qui les clés porte
Oevre la porte toute arriere,
Sus le conduit et le maniere
Des damoiselles de laiens.
Evous tantost que sallent gens
De tous lés, qui moult biel recueillent f. 134 b
Melyador et si l’accueillent
A fester et a conjoïr.
Et quant la dame peut oïr
Que cilz laiens estoit venus,
De cui tous bleus est li escus
Page:Froissart - Méliador, tome 2.djvu/264
Le texte de cette page a été corrigé et est conforme au fac-similé.
260
Méliador
