Adont parti sus cest afaire
Melyador dou dit castiel.
On le mist hors par .i. praiiel
Qui regardoit devers le bois.
Tant fist li chevaliers courtois
Que, sans estre recogneüs,
Au logeïs est revenus
Dont il estoit le soir partis.
Grandement en fu resjoïs
Ses escuiers quant il le vit.
Melyador li a tout dit
Quanqu’il a veü et trouvé.
Jamais ne li euïst celé,
Car en lui avoit grant fiance,
Et cilz, qui ot grant cognissance,
Li dist : « Sire, bien va la cose.
« Or me dittes a la parclose
« Se vous avés a vo retour,
« En considerant la valour
« D’Ermondine et son gent maintien,
« Fait aucune cose de bien,
« Rondelet, balade ou cançon, f. 131 b
« Pour mieulz emploiier vo saison,
« Qui en estes tres grans ouvriers. »
— « Oïl, » respont li chevaliers,
« J’ai fait .i. petit rondelet,
« Et le commençai de grant het
« A faire, sitos que parti
« De ma dame et que jou issi
« Dou dit chastiel, saciés pour voir. »
Dist cilz : « Il le nous fault savoir.
« Si en dirai ce qu’en samblance
« M’en venra et sans detriance. »
Et Melyador li respont :
« Tu l’oras. » A ces mos adont
A le rondelet commencié,
De coer gay, amoureus et lié.
Page:Froissart - Méliador, tome 2.djvu/252
Le texte de cette page a été corrigé et est conforme au fac-similé.
248
Méliador
