« Mais tant y a de courtoisie
« En vous, et si bien le savés,
« Que escusées nous avés. »
— «
ame, » ce dist li chevaliers,
« Mais me rench tous ens es dangiers
« De vous, et especialment
« De ma dame certainnement,
« Que je voi ci en ma presence.
« Mais je croi que trop hault je pense
« Et de ce fait voir j’en encoupe
« Amours, et di qu’il est en coupe ;
« Car, en espoir d’avoir merci,
« Penser m’i a fait jusqu’a ci
« Et fera tant com jou vivrai,
« Ne aultre penser je n’avrai. »
Hermondine adont le regarde
Et son parler plus ne retarde,
Que tout pourveü elle avoit,
Je le croi, car trop bien servoit
Et servi a leur ordenance,
Car elle dist de pourveance :
« Sire, mieulz samblés chevaliers
« Que vous ne faites merceniers,
« Qui vous a veü au tournoy.
« Pas ne moustriés la, par ma foy,
« Que sceuïssiés anelès vendre,
« Car j’ai hui veü hault estendre
« Vos bras et donner horïons
« Si grans, que je croi qu’il n’est homs
« Qui a vous se peuist attaindre.
« Trop bien fesistes vos mains taindre,
« Quant le mercenier vous fesistes f. 129 c
« Et a Montsegur vous venistes.
« Cognissiés vous cest anelet ? »
Page:Froissart - Méliador, tome 2.djvu/245
Le texte de cette page a été corrigé et est conforme au fac-similé.
241
Méliador