« Dittes qu’il est fais et escris :
« Li mieus tournïans la journée
« Conquerra une blanche espée
« Que les dames deliveront,
« Qui avoech ma fille seront.
« Mais je vous enjoinc et commande
« Que point, oultre Norchombrelande,
« Ne recordés cestes nouvelles. »
Et cil, qui ont ja mis leurs selles,
Respondent : « Sire, volentiers
« Nous le dirons as chevaliers,
« Que d’aventure encontrerons :
« Vostre plaisir tres bien ferons. »
dont se sont sus ce parti
A Hiraut de Monsegur parti,
Et s’espendent par le pays
Pour anoncier, j’en suis tous fis,
Le tournoy la ou [il] doit estre.
Partout, a droite et a senestre,
Chevaucent et leur chemin tienent.
En ce terme les dames vienent
Avoech le roi a Signandon.
Li rois donne la .i. biau don
A sa fille et a sa cousine :
N’i a chambre ne offecine,
Que on n’ait remis en bon point.
Cilz tournois voir ne faudra point
Qu’il ne se tiegne et ne se face
Devant Signandon, en la place
Ou de ce temps on tournioit
Et les dames esbanioit. f. 109 a
Page:Froissart - Méliador, tome 2.djvu/162
Le texte de cette page a été corrigé et est conforme au fac-similé.
158
Méliador
