Vous demandés en ſuitte pour quoy les choſes eſgales reſueillent plus l’attention en montant qu’en deſcendant : ie ne me ſouuiens plus de ce que ie vous en auois eſcrit, toutefois ie vous diray que ce n’eſt 5 point pour ce qu’elles ſont eſgales ou ineſgales, mais generalemant pour ce que le ſon qui eſt plus aygu que celuy qui le precede (comme il eſt lorſque les parties montent), reueille & frappe plus l’oreille que celuy qui eſt plus graue ; et en vn concert de muſique, ſi les 10 vois vont preſque touſiours eſgalemant ou qu’elles s’abbaiſſent & alentiſſent peu a peu, cela endormira les auditeurs ; mais ſi au contraire on rehauſſe la vois tout d’vn coup, ce ſera le moyen de les reueiller.
Selon diuerſes conſiderations, on peut dire que le 15 ſon graue eſt plus ſon que l’aigu, car il ſe fait par des corps de plus grande eſtendue, il ſe peut entendre de plus loing, etc. Mais il eſt dit fondemant de la muſique principalemant pour ce qu’il a ſes mouuemans plus lents & par conſequent qui peuuent eſtre diuiſés en 20 plus de parties ; car on nomme fondemant ce qui eſt comme le plus ample & le moins diuerſifié & qui peut ſeruir de ſuget ſur lequel on batiſt le reſte : comme les premiers traits d’vn crayon peuuent eſtre dits le fondemant d’vn portrait, encore qu’ils ſemblent moins 25 paroiſtre que ce qu’on y adiouſte par apprés auec les couleurs viues.
